«Երկիր», 17 հունիսի, 1992թ.
Հունիսի լույս 16-ի գիշերը ծանր հրետանուց հրետակոծվել են Նոյեմբերյանի շրջանի Կոթի եւ Ոսկեպար գյուղերը, որի հետեւանքով գյուղերում քանդվել են 5 բնակելի տներ: Ադրբեջանցիները առևանգել և Այրում ադրբեջանական գյուղի ուղղությամբ են տարել մեկ վիրավոր մարտիկի, որի ճակատագիրն անհայտ է: Կեսօրին մարտերը դեռ շարունակվում էին: Հայկական ինքնապաշտպանական ուժերը օգնության խիստ կարիք էին զգում:
Օրվա ընթացքում հանգիստ չէր նաև հարևան Իջևանի և Տավուշի շրջանի սահմաններում: Նախորդ գիշերը եւ հունիսի 16-ի օրվա ընթացքում ադրբեջանական բանակը բոլոր տեսակի զենքերով գնդակոծության է ենթարկել Իջևանի շրջանի սահմանամերձ գյուղերը: Հայկական կողմից զոհեր եւ վիրավորներ չկան։
Հունիսի լույս 16-ի գիշերվա ընթացքում ինքնաձիգային կրակահերթեր են տեղացել նաեւ Տավուշի շրջանի հայկական սահմանապահ ուղեկալների եւ սահմանամերձ գյուղերի ուղղությամբ, որոնց հետեւանքով թեթեւ վիրավորվել է մեկ մարտիկ: Օրվա ընթացքում հարաբերական հանգստություն էր տիրում:
