Ազգ, 8 սեպտեմբերի, 1992թ., թիվ 83(175)
ԼՂՀ Գերագույն խորհրդի նախագահությունը մտահոգություն է հայտնել, որ Մինսկի խորհրդաժողովի նախապատրաստական աշխատանքների սահմաններում Ղարաբաղյան հիմնահարցի կարգավորման ուղիների որոնումը ընթանում է միայն խորհրդաժողովի անդամ երկրների քաղաքական շահերի հունով: Ընդ որում, ամբողջովին անտեսվում են ընդհանուր ճանաչում գտած միջազգային իրավական ակտերը Լեռնային Ղարաբաղի վերաբերյալ:
ԼՂՀ Գերագույն խորհրդի նախագահության երեկ հրապարակված հաղորդագրության մեջ, որն ուղղված է Մինսկի խորհրդաժողովի անդամ երկրների կառավարություններին, նշվում է, որ նմանատիպ մոտեցումը հիմնահարցի նկատմամբ միայն բարդացնում է առանց այն էլ բարձ իրավիճակը տարածաշրջանում:
Լեռնային Ղարաբաղի Հանրապետության Գերագույն խորհրդի նախագահությունը պատրաստ է ներկայացնել իրավաբանորեն հիմնավորված բոլոր ակտերի ծրարը Լեռնային Ղարաբաղի վերաբերյալ: Այդ փաստաթղթերը վկայակոչում են, որ ԼՂՀ ղեկավարության դիրքորոշումը ամբողջովին համապատասխանում է միջազգային իրավական նորմերին, նշվում է հայտարարության մեջ:
