«Հայաստանի Հանրապետություն», 2 սեպտեմբերի, 1993թ., թիվ 174(778), հինգշաբթի
Օգոստոսի 31-ի ամբողջ օրվա ընթացքում Ադրբեջանը շարունակել է ագրեսիվ գործողությունները Հայաստանի սահմանների ուղղությամբ: Կուբաթլիի զինված կազմավորումները հրետանային նախապատրաստությունից հետո, տանկերի և զրահամեքենաների աջակցությամբ հարձակում են ձեռնարկել Կապանի Դավիթ Բեկ և Գորիսի Շուռնուխ գյուղերի միջև ընկած սահմանագծի ողջ երկայնքով, «Գրադ» կայանքներից հրետակոծության ենթարկելով նաև Գորիս քաղաքը: Միաժամանակ շրջանի օդային տարածք են ներխուժել հակառակորդի ՄԻ-24 տիպի ռազմական երեք ուղղաթիռ: Անցնելով հակագրոհի, հայկական ուժերը ետ են մղել գրոհը, ադրբեջանցիներին պատճառելով կենդանի ուժի և ռազմական տեխնիկայի կորուստներ: Խփվել է սահմանախախտ ուղղաթիռներից մեկը: Նահանջելով ելամ դիրքերը, ադրբեջանցիները գիշերվա ընթացքում շարունակել են հեռահար հրետակոծությունը: Հայկական կողմից տուժածներ չկան:
ՀՀ պաշտպանության նախարարության լրատվական ծառայությունից հաղորդեցին նաև, որ սեպտեմբերի 1-ի գիշերը կարճատև փոխհրաձգություն է տեղի ունեցել Կրասնոսելսկի Վահան և Իջևանի Վազաշեն գյուղերի սահմանագծերում, որի ընթացքում հակառակորդն օգտագործել է գնդացիրներ և ականանետներ: Մեր կողմից տուժածներ չկան:
Երեկ, սեպտեմբերի 1-ին, լարվածությունը Հայաստանի սահմաններում պահպանվում էր: Կեսօրին ադրբեջանական հետևակը վերստին փորձել է ճեղքել հայկական պաշտպանությունը Շուռնուխ-Դավիթ Բեկ ավտոճանապարհի հատվածում: Հայկական ուժերի պաշտպանական մարտերից հետո թշնամու գրոհը ետ է մղվել:
Արմենպրես
