«Հայաստանի Հանրապետություն», 25 մարտի, 1993թ.
Հայաստանի Հանրապետության Գերագույն խորհրդի նախագահ Բ.Գ. Արարքցյանի հրավերով Ռուսաստանի Դաշնության Գերագույն խորհրդի պատվիրակությունը Գերագույն խորհրդի նախագահ Ռ.Ի. Խասբուլատովի գլխավորությամբ 1993թ. մարտի 19-20-ը պաշտոնական այցով գտնվում էր Հայաստանում:
Երևանում տեղի ունեցած հանդիպումների և բանակցությունների ընթացքում, որոնց մասնակցում էր Հայաստանի Հանրապետության փոխնախագահ Գ.Գ. Հարությունյանը, քննարկվեց Հայաստանի Հանրապետության և Ռուսաստանի Դաշնության, նրանց բարձրագույն օրենսդիր մարմինների միջև հարաբերություններին, Անկախ Պետությունների Համագործակցությունում առկա իրավիճակին, կովկասյան տարածաշրջանի դրությանը վերաբերող հարցերի լայն շրջանակ: Քննարկվեցին միջազգային հրատապ հիմնահարցեր:
Երկուստեք գոհունակություն արտահայտվեց հայ-ռուսական հարաբերությունների բարեկամական բնույթի, երկու երկրների միջև համագործակցության մշտապես ընդլայնվող պայմանագրային-իրավական հիմքերի առթիվ: Արտահայտվեց հայ-ռուսական հարաբերությունների հետագա զարգացման փոխադարձ շահագրգռվածություն, երկու պետությունների փոխգործունեության օրենսդրական հիմքերի ամրապնդման պատրաստակամություն: Ընդգծվեց, որ տնտեսության բնագավառում կարևոր նշանակություն ունի միասնական տնտեսական տարածքի առավելությունների օգտագործումը:
Կողմերն ընդհանուր անհանգստություն արտահայտեցին տրանզիտային բեռնափոխադրումների հիմնահարցի դեռևս կարգավորված չլինելու, ստանձնած պարտավորությունների կատարման պատասխանատվությունը և երաշխիքները կարգավորող պատշաճ իրավական հիմքերի բացակայության առթիվ: Պատրաստակամություն արտահայտվեց նշված հարցերը լուծել երկկողմանի և բազմակողմանի հիմքի վրա:
Հայկական կողմը նշեց երկրաշարժի գոտում վերականգնման աշխատանքները Ռուսաստանի կողմից շարունակելու կարևորությունը:
Ռուսաստանի կողմից ըմբռնում և կարեկցանք արտահայտվեց Հայաստանի Հանրապետության ժողովրդի կրած դժվարությունների կապակցությամբ: Ռուսաստանը պատրաստ է շարունակել ուժերի ներածին չափ Հայաստանին օգնություն ցույց տալ հանրապետության բնակչության սոցիալ-տնտեսական կացությունը թեթևացնելու ուղղությամբ:
Մեծ ուշադրություն հատկացվեց Հայաստանի Հանրապետության Գերագույն խորհրդի և Ռուսաստանի Դաշնության Գերագույն խորհրդի միջև համագործակցության ամրապնդման, Հայաստանի Հանրապետության և Ռուսաստանի Դաշնության բարձրագույն օրենսդիր մարմինների աշխատանքի մասին փոխադարձ տեղեկատվության բարելավման կոնկրետ ուղղություններին:
Կողմերն արտահայտվեցն այն բանի օգտին, որ Հայաստանը և Ռուսաստանը, նրանց խորհրդարանները այսուհետ ևս համաձայնեցված ուղեգիծ իրականացնեն ԱՊՀ-ի շրջանակներում և միջազգային ասպարեզում, համատեղ ջանքերով առաջ քաշեն մարդու և ազգային փոքրամասնությունների իրավունքների պահպանման մեխանիզմի ստեղծման, քաղաքացիության, սոցիալ-հումանիտար պրոբլեմների լուծման հարցեր, ինչպիսին է Համագործակցության քաղաքացիների կենսաթոշակային ապահովությունը:
Առանձնահատուկ ուշադրություն հրավիրվեց ԱՊՀ միջխորհրդարանական վեհաժողովի շրջանակներում համագործակցելու, փոխգործունեության այն բազմակողմ մեխանիզմն ամրապնդելու հեռանկարներին՝ Համագործակցության պետությունների զարգացման օրենսդրական հիմքերը ներդաշնակելու նպատակով: Հայկական և ռուսական խորհրդարանականները մտահոգություն հայտնեցին չդադարող ռազմական ընդհարումների հետևանքով Անդրկովկասում ստեղծված իրավիճակի կապակցությամբ:
Կողմերն ընդգծեցին ղարաբաղյան կոնֆլիկտի քաղաքական լուծման որոնումները հետևողականորեն շարունակելու անհրաժեշտությունը՝ կրակի անվերապահ դադարեցման, ուղիղ երկխոսության իրականացման: ԵԱՀԽ-ի հովանու ներքո խաղաղության կոնֆերանսի շրջանակներում, որի նախապատրաստման գործում նկատվել է իրական առաջընթաց, ինչպես նաև ՄԱԿ-ի աջակցությամբ կոնկրետ պայմանավորվածություններ ձեռք բերելու հիման վրա: Պատրաստակամություն հայտնվեց այդ ջանքերն ամրապնդել միջխորհրդարանական երկխոսության ուղղությամբ: Հայկական կողմը բարձր գնահատեց ռուսական կողմի պատրաստակամությունը՝ շարունակելու միջնորդական ջանքերը տվյալ հիմնահարցի փոխադարձորեն ընդունելի հանգուցալուծումներ և արդար որոշումներ գտնելու նպատակով:
Ռուսաստանի Դաշնության Գերագույն խորհրդի նախագահ Ռ.Ի. Խասբուլատովը Հայաստանի Հանրապետության Գերագույն խորհրդի նախագահ Բ.Գ. Արարքցյանին հանձնեց պաշտոնական այցով Ռուսաստան այցելելու հրավեր: Հրավերն ընդունվեց շնորհակալությամբ:
Հայաստանի Հանրապետության Գերագույն խորհրդի նախագահ Բ. Արարքցյան
Ռուսաստանի Դաշնության Գերագույն խորհրդի նախագահ, ԱՊՀ միջխորհրդարանական վեհաժողովի խորհրդի նախագահ Ռ. Ի. Խասբուլատով
