«Հայաստանի Հանրապետություն», 12 օգոստոսի, 1993թ., թիվ 159(763), հինգշաբթի
Ադրբեջանական աղբյուրները շարունակում են աղաղակել ղարաբաղյան կողմից իբր Ֆիզուլին գրոհելու վերաբերյալ: Եվ դա այն դեպքում, երբ անցած օրերի ընթացքում հատկապես Ֆիզուլիում տեղակայված հսկայաքանակ հրթիռային և հրետանային կայանքներից անընդհատ գնդակոծությունների են ենթարկվում Հադրութի և Մարտունու շրջանները: Այս շրջանների բնակավայրերը ռմբակոծվում են նաև ադրբեջանական օդուժի պարբերական թռիչքների ընթացքում: Այս գործողությունների հետևանքով Ղարաբաղի խաղաղ բնակչության շրջանում կան զգալի զոհեր:
Օգոստոսի լույս 11-ի գիշերը կրկին հրթիռահրետակոծության է ենթարկվել Հադրութ շրջկենտրոնը և Դրախտիկ գյուղը: Հետևանքների մասին տվյալները ճշտվում են: Միաժամանակ, ինչպես հաղորդեցին ԼՂՀ պաշտպանության բանակի շտաբից, ադրբեջանական բանակի ռազմական տեխնիկայի խոշոր կուտակումներ են նկատվում Մարտունի շրջկենտրոնից հյուսիս-արևելքում:
Արմենպրես
