«Ազգ», օգոստոսի 7, շաբաթ, 1993թ.
«Հանրապետության նախագահը բազմիցս նշել է, որ մենք կողջունենք ցանկացած համաձայնեցված փաստաթուղթ, որը կընդունեն Ադրբեջանի և Լեռնային Ղարաբաղի իշխանությունները: Բոլոր միջազգային խորհրդաժողովներում մենք կողմ կքվեարկենք նման փաստաթղթերին»,- այսպիսի հայտարարությամբ երեկ հանդես եկավ ՀՀ նախագահի մամուլի քարտուղար Արամ Աբրահամյանը: Նա հույս հայտնեց, թե Մինսկի խումբն ու նրա նախագահը կաջակցեն այդ գործընթացներին և նույնպես կողմ կլինեն Ադրբեջանի և Ղարաբաղի միջև ձեռք բերված պայմանավորվածություններին: «Կարծում եմ, ասաց մամուլի քարտուղարը, դա կաջակցի ԵԱՀԽ ջանքերին, և կլուծվեն զինադադարի ռազմատեխնիկական ապահովման, ԵԱՀԽ դիտորդների աշխատանքային խմբերի ստեղծման, ՄԱԿ-ի բանաձևերում նշված միջազգային մարդասիրական նորմերի կատարման հետ կապված խնդիրները: Նրա կարծիքով, այդ դեպքում ԵԱՀԽ-ին կհաջողվի ստեղծել զինադադարի և ռազմական գործողությունների ապասաստկացման միջազգային երաշխիքներ: «Եթե Ադրբեջանն ու Ղարաբաղը իրատես լինեն և ոչ ոք նրանց չխանգարի, նրանք կարող են պայմանավորվել»,- ասաց նա:
Խոսելով նախագահի՝ Տեր-Պետրոսյանի և ԼՂՀ ՊՊԿ նախագահ Ռոբերտ Քոչարյանի հանդիպման մասին, մամուլի քարտուղարը նշեց, որ քննարկված տարաբնույթ հարցերի էությունը մեկն է եղել՝ գտնել ռազմական հակամարտությանը վերջ տալու ամենագործուն ճանապարհները:
Պրն. Աբրահամյանը տեղեկացրեց, որ Մինսկի խումբը Հայաստանի, Ղարաբաղի և Ադրբեջանի ներկայացուցիչներին օգոստոսի 9-ին հրավիրել է Հռոմ՝ մասնակցելու խորհրդակցությունների:
Հայաստանի մասնակցության հարցը քննարկվելու է հանրապետության Անվտանգության խորհրդի նիստում, որտեղ էլ կորոշվի, թե ով է գնալու: ԼՂՀ-ից տեղեկացանք, որ այդ հարցի առնչությամբ քննարկումները Ստեփանակերտում նույնպես շարունակվում են: Միևնույն ժամանակ երեկ Մինսկի խմբի կողմից Հայաստանի, Ադրբեջանի և Լեռնային Ղարաբաղի ղեկավարությանն է ուղարկվել ևս մեկ փաստաթուղթը՝ «Անհետաձգելի միջոցառումների մասին» նոր ժամանակացույցը:
