September 17, 2021

Բաքվում

  • by Archives.am
  • 3 Years ago
  • 0

Մշակ, 31 մայիսի 1918թ., թիվ 100

Բաքվից եկողները պատմում են, որ դրությունն այնտեղ քանի գնում վատթարանում է: Պարենի մթերքներ գրեթե չկան: Հացը մեծ դժվարությամբ է ճարվում, այն էլ սաստիկ թանկ, ֆունտը 7-8 ռ.: Փողոցներում միշտ կարելի է հանդիպել քաղցած մարդկանց: Լինում են սովամահության դեպքեր: Գործարանները համարյա կանգ են առել: Բանվորները կամ մտել են կարմիր գվարդիայի մեջ, կամ հետզհետե մեկնում են Ռուսաստան: Բաքվի հայ ընտանիքները մեկնում են Ռուսաստան, իսկ թուրք ընտանիքները Պարսկաստան:

Հայերի և թուրքերի միջև հարաբերություններն ընդհատվել են: Փոխադարձ վստահությունը միանգամայն վերացել է:

Բոլշևիկների դրությունը հաստատուն է: Թուրք սոցիալիստական տարրերը նրանց հետ միացած են գործում: Դր. Նարիմանով և Ազիզբեկով գործում են իբրև խորհուրդների իշխանության համակիրներ:

Հայ և թուրք մասսաները բոլշևիկներից ոչինչ լավ բան չեն սպասում: Անհայտ ապագայի երկյուղը ճնշում է նրանց: Օրը օրին սպասում են ահարկու դեպքերի: Գիշերներն անցնում են անհանգիստ, տագնապով լի: Մարդիկ իրենց զգում են դատապարտվածներ, որ այսօր կամ էգուց կրելու են իրենց պատիժը:

Շամախու և մյուս ավերված հայկական գյուղերի ազգաբնակչությունը կուտակվել է Բաքվում: Նրանց պատմելով, Շամախին ամբողջապես ավերված է: Մնացել են մի քանի շենքեր միայն և աննշան հյուղեր քաղաքի ծայրամասերում: Ներկայումս Շամախին անբնակ է: Նրա բնակիչները Բաքվում ապրում են ամենածանր, աներևակայելի ծանր օրեր: Քաղցից և հիվանդություններից մեռնում են տասնյակներով, մեծ մասամբ երեխաներ: Բաքվում Աստրախանի վրայով ստացվել է զինվորական օգնություն: Հյուսիսային Կովկասից նույնպես սպասվում են մեծ ուժեր:

  • facebook
  • googleplus
  • twitter
  • linkedin
  • linkedin
Previous «
Next »

Leave a Reply

Your email address will not be published. Required fields are marked *

Categories

Archives