Մինիստր-նախագահ Խատիսյանին

Սյունիք, 21 մարտի, 1920թ., թիվ 10

Հեռագիր, 21 մարտի, ժամը 10

ՇՏԱՊ

Պատճենը՝ ներքին գործերի մինիստր Աբրահամ Գյուլխանդանյանին

Այս րոպեիս ստացած տեղեկությունների համաձայն, տաճկական ասկյարները տաճկական սպաների գլխավորությամբ, Օրդուբադի և Նախիջևանի թաթարները Ադրբեջանի սպաների ղեկավարությամբ, ընդհանուր հարձակում են կազմակերպել Գողթանի հայկական գյուղերի վրա, նպատակ ունենալով նվաճելու և ոչնչացնելու նրանց: Հայ գյուղացիությունը մահացու կռիվ է մղում նենգ ու անպատիժ թշնամու դեմ: Ի սեր փրկության հերոսական ազնիվ և աշխատասեր գյուղացիության՝ միջոցներ մի խնայեք, բողոքեցեք խորամանկ Ադրբեջանի ինտրիգաների դեմ, որ ցանկանում է հայության մնացորդների դրակների վրայից կամուրջ անցկացնել դեպի Տաճկաստան:

Պահանջեցեք դաշնակիցներից զսպելու Ադրբեջանին և տաճկական սպաներին:

Զանգեզուրի գյուղացիությունը հուզված է Ադրբեջանի ստոր գործողություններից և պահանջում է դիմադրություն ցույց տալ:

Ձեր խորհուրդները հարկադրում են ինձ մեծամեծ դժվարություններով առաջն առնել բարդությունների և հանգստացնել նրանց:

Զանգեզուրի գեներալ-կոմիսար՝ Ս. Մելիք-Յոլչյան