Սյունիք, 25 մարտի, 1920թ., թիվ 11
Մարտի 2-ին. Նախագահ-մինիստրից
Հայաստանի կառավարությունը ամենաջերմորեն շնորհավորում է մեր ժողովրդին և իր ռազմական ուժերին՝ տարած հաղթությունների համար: Կառավարությունը հպարտ է ձեզնով, ուղարկում է ձեզ իր ջերմագին ողջույնները:
Մեր հայրենիքը վերածնվել է և ի մի է հավաքում իր անբաժան մասերը: Մեր ժողովրդի զավակների արյամբ և զոհաբերություններով դարբնվում է Ամբողջական Հայաստանը:
Թող ծածանվի Հայաստանիեռագույն դրոշակը Զանգեզուր-Ղարաբաղի լեռների և բերդերի վրա: Փառք և պատիվ հերոսներին, հավերժ հիշատակ հայրենիքի փրկության համար ընկած նահատակներին: Հայ ժողովուրդը հիացմունքով է նայում ձեզ վրա. կեցցե՜ Զանգեզուր-Ղարաբաղի հայ ժողովուրդը, որը պաշտպանում է իր հայրենիքը և ազատությունը: Կեցցե՜ Ամբողջական Հայաստանը:
Հայաստանի կառավարության նախագահ Ա. Խատիսյան
* * *
Ներքին գործոց մինիստրից.
Ապրիլի 8-ին. Շնորհավորում եմ ձեզ և Զանգեզուր-Ղարաբաղի քաջարի ժողովրդին տարած հաղթությունների համար: Զանգեզուր—Ղարաբաղի հերոս ժողովուրդը ցույց տվավ, որ իր կամքը անընկճելի է և որ նա չի կարող տանել Ադրբեջանի անարգ լուծը:
Կեցցե՜ ազատության արժանի ժողովուրդը: Հայտնում եմ, որ դաշնակից պետությունների ներկայացուցիչները, համաձայն մեր հեռագրերի և ջանքերի համաձայնվել են ուղարկել քննիչ հանձնաժողով՝ Թիֆլիս-Եվլախով Շուշի՝ ծանոթանալու դեպքերի հետ և միջոցներ ձեռք առնելու:
Ներքին գործոց մինիստր՝ Ա. Գյուլխանդանյան
* * *
Հայաստանի պառլամենտի նախագահից
Ապրիլի 10-ին. Պառլամենտը ապրիլի 3-ի նիստում հիացմունքով և խանդավառությամբ լսեց Ղարաբաղի և Զանգեզուրի հայության հերոսական հաջողությունը: Ուղարկում եմ ձեզ և ձեր միջոցով մեր հերոսական ժողովրդին պառլամենտի ողջունները, վստահ ենք, որ կշարունակեք նույն անձնվիրությամբ ձեր նվիրական պայքարը՝ Հայաստանի անբաժան մաս կազմող Ղարաբաղի և Զանգեզուրի վերջնական ազատագրման համար:
Նախագահ պառլամենտի՝ Ա. Սահակյան
