Հայաստանի աշխատավոր, 9 հուլիսի, 1919թ., թիվ 91
Հուլիսի 4-ին մեր զորամասը Դավալուի շրջանի Բոյուք-Վեդի գյուղի ազգաբնակությանը պահանջ դրեց հանձնել զանազան ժամանակներում այդ գյուղի ազգաբնակության կողմից սպանված մեր զինվորների հանցավորներին, վերադարձնել սպանված զինվորներից խլած զենքերը և հերթական ապահովություն տալ սպանվածների ընտանիքներին: Բոյուք-Վեդի գյուղի ազգաբնակությունը մերժեց կատարել հիշյալ պահանջները: Զորախմբի մի մասը առաջ շարժվեց գյուղը գրավելու համար: Ազգաբնակությունը հրացանային ու գնդացրային կրակ բացեց զորամասի վրա: Այդ պատճառով զորամասի հրամանատարը հետ քաշեց զորքերի առաջավոր մասերը և որոշեց պետության շահերն այդ ապստամբ գյուղի դեմ պաշտպանելու համար համապատասխան միջոցներ ձեռք առնել: Անցուդարձի մասին մանրամասնորեն տեղեկացված է անգլիական միսիայի Երևանի ներկայացուցչին:
