Մշակ, 14 նոյեմբերի, 1917թ., թիվ 243
Այսօր, նոյեմբերի 14-ին, ցերեկվա ժամը 2-ին քաղաքներում վերջանում են ընտրությունները:
Առաջին երկու օրը բավականին սառը վերաբերմունք էր նկատվում հայ ազգաբնակության կողմից: Արձանագրելով այդ փաստը՝ մենք կոչ ենք անում նրանց, ովքեր չեն կատարել իրենց քաղաքացիական պարտքը, շտապեն կատարելու:
Ռուս և վրացի ազգաբնակչությունը, մանավանդ կանայք օրինակելի պարտաճանաչություն էին ցույց տալիս, և միայն հայ տարրն էր, մանավանդ հայ կինը, որ ցույց էր տալիս դատապարտելի անտարբերություն ընտրությունների առաջին օրերին:
Կրկին ու կրկին անգամ մենք հրավեր ենք կարդում ընտրելու իրավունք ունեցողներին, որոնք դեռևս իրենց ձայնը չեն տվել, անպատճառ օգտվել իրանց ձայնի իրավունքից:
Պարտքի գիտակցությունը և պատվասիրությունը պետք է թելադրի ամենքին, որ աններելի է անտարբեր մնալը այսպիսի օրերին, որ անձնական ու անհատական շահից բացի կա ընդհանուր շահ և ազգային գերագույն գործ, որին պարտավոր են ձգտել և որի առաջ պետք է խոնարհվեն ամենքը:
Ազգային ընդհանուր գործերից մեկն էլ ներկա ընտրություններն են, որ տալու են ազգի ընտրյալներին ուժ ու կշիռ:
