Հայաստանի Հանրապետություն, 10 հոկտեմբերի, 1992 թ., թիվ 201 (546)
Հոկտեմբերի 8-ի երեկոյան և գիշերը իրադրությունը լարված էր Տավուշի, Իջևանի, Մեղրու, Նոյեմբերյանի և Կապանի սահմանագոտիներում: Տավուշում է Իջևանում ադրբեջանցիների հրետակոծումները և գնդակոծումները լուրջ հետևանքներ չեն ունեցել: Ինչպես հայտնեցին Արմենպրեսին ՀՀ պաշտպանության նախարարության լրատվական ծառայությունից, Մեղրու շրջանի Նյուվադիի ուղղությամբ Զանգելանի տարածքից ժամը 18-ից 19-ը արձակած հրետանային արկերից ավելի շատ տուժել է հարևան Իրանը, որի տարածքում հերթական անգամ պայթած ադրբեջանական ռումբերը հրդեհների պատճառ են դարձել:
Ժամը 24-ից մինչև 6-ը եղած հրետակոծությունների հետևանքով Նոյեմբերյանի Շավարշավան գյուղում վիրավորվել է երկու մարդ, Կապանի Եղվարդ գյուղում, որի վրա արձակվել էր «Գրադ» կայանքի մեկ լրիվ համազարկ, զոհվել է մեկ կին, ավերվել մի քանի շենք: «Գրադի» տակ են ընկել և մասնակիորեն վնասվել նաև Ոսկեպար, Բաղանիս (Նոյեմբերյանի շրջան), Ագարակ, և Ներքին հանդ (Կապանի շրջան) գյուղերը:
Վերջերս հաճախակի են դարձել Վարդենիսի սահմանների մոտ ադրբեջանական զինված հեծյալների հայտնվելու դեպքերը: Երեկ, օրվա ընթացքում, նկատվել է շուրջ 120 այդպիսի հեծյալ: Ինչպես հայտնի է սեպտեմբերի 30-ին այդ խմբի 30 հոգանոց ջոկատը գրոհ էր ձեռնարկել Վերին Շորժա գյուղի հանդամասի վրա, սակայն հայ մարտիկների առաջին իսկ կրակոցներից ցաք ու ցրիվ փախուստի էր դիմել:
Հոկտեմբերի 8-ին, ժամը 22 անց 30-ին, Գետաբեկի զինյալները գիշերվա քողի և զրահատեխնիկայի պաշտպանության ներքո, գրոհել են Կրասնոսելսկի շրջանի Վահան գյուղի ուղեկալի վրա: Սակայն հանդիպելով մեր մարտիկների դիմահար կրակին փախուստի եմ դիմել, երկու ժամ անց դադարել է նաև փոխհրետակոծությունը: Հայկական կողմից տուժածներ չկան:
Հոկտեմբերի 9-ին, օրվա երկրորդ կեսին, Զանգելանի Ղազանչի ռազմական հենակետից կարճատև գնդակոծությունների է ենթարկվել Կապան քաղաքը: Տուժածներ չկան: Ժամը 17-ին նույն Զանգելանի տարածքից «Գրադ» կայանքներից և հրանոթներից վերստին կրակ է բացվել Նյուվադի գյուղի սահմանապահ ուղեկալի վրա: Հայ մարտիկները պատասխան գործողությունների են դիմել: Ժամը 18-ն անց 30-ի դրությամբ կրակը շարունակվում է:
