«Հայաստանի Հանրապետություն», 13 օգոստոսի, 1993թ., թիվ 160(764), ուրբաթ
Եվրախորհրդակցության՝ Լեռնային Ղարաբաղի հիմնախնդրով զբաղվող Մինսկի խմբի մասնակից ինը երկրների՝ Բելառուսի, Գերմանիայի, Իտալիայի, Ռուսաստանի, ԱՄՆ-ի, Թուրքիայի, Ֆրանսիայի, Չեխիայի և Շվեդիայի ներկայացուցիչները «խորը մտահոգություն են հայտնում Մարտունու, Ֆիզուլիի և Հադրութի գոտում ռազմական գործողությունների սաստկացման մասին ստացվող հաղորդումների կապակցությամբ, որը կարող է ողբերգական հետևանքներ ունենալ տասնյակ հազարավոր խաղաղ բնակիչների համար և վնաս հասցնել հաշտության գործընթացին»: Այդ մասին ասվում է Հռոմում հրապարակված դիմումի մեջ, որը Մինսկի խմբի անդամներն ընդունել են չորեքշաբթի ղարաբաղյան հակամարտության մասնակից կողմերի ներկայացուցիչների հետ Հռոմում շարունակվող կոնսուլտացիաների ընթացքում: Այդ բանակցություններում առանձնահատուկ ուշադրություն է դարձվում ՄԱԿ-ի Անվտանգության խորհրդի 822 և 853 բանաձևերի կատարմանը:
«Հանդիպման մասնակիցները կոչ են անում անհապաղ դադարեցնել մարտական գործողությունները և անմիջական շփումների միջոցով վերականգնել հրադադարը, որը պահվում էր տասը օրից ավելի, ձեռնպահ մնալ բնակավայրեր և այլ տարածքներ գրավելուց, գնդակոծումներից և ռմբակոծումներից»,— ասվում է եվրախորհրդակցության Մինսկի խմբի անդամների դիմումի մեջ:
