«Հայաստանի Հանրապետություն», 3 սեպտեմբերի, 1993թ., թիվ 175(779), ուրբաթ
Մոսկվայում տարածվել է Ռուսաստանի արտգործնախարարության ներկայացուցչի հայտարարությունը, որի մեջ մասնավորապես ասվում է. «Լեռնային Ղարաբաղին առնչված ռազմաքաղաքական իրադրությունը մնում է բավականին բարդ»:
Իրանի և մյուս երկրների զանգվածային լրատվության միջոցներով հաղորդումներ են տարածվում, որ ջրամբարների և մյուս սահմանամերձ օբյեկտների պահպանության պատրվակով իրանական զինված խմբերը անցնում են Ադրբեջանի սահմանը: Այդ հաղորդումները սոսկ սրում են մթնոլորտը այն ժամանակ, երբ միջազգային հանրակցության, հարևան երկրների ու հենց իրենց՝ հակամարտության մասնակիցների շահերին համապատասխանում են շրջահայեցությունն ու խոհեմությունը, ռազմական գործողությունների անհապաղ դադարեցումը՝ ՄԱԿ-ի Անվտանգության խորհրդի բանաձևին համապատասխան և ջանքերի կենտրոնացումը վիճելի հարցերի քաղաքական լուծման վրա:
Ռուսաստանի օժանդակությամբ մինչև սթ. սեպտեմբերի 10-ը հրադադարը վերսկսելու շուրջը կայացած համաձայնությունը հնարավորություն է ընձեռել գործնական քայլերի դիմելու արյունահեղությունը դադարեցնելու համար:
Հայաստանի նախագահի կոչով և միջնորդի պնդմամբ սեպտեմբերի 1-ին Լեռնային Ղարաբաղի ղեկավարությունը որոշում ընդունեց իր ուժերը հետ քաշելու դեպի ավելի վաղ զբաղեցրած դիրքերը:
Ռուսաստանի արտգործնախարարությունը հակամարտության մասնակիցներին վերստին հաստատակամ կոչ է անում խստիվ կիրառել կայացված համաձայնությունը, պատասխանատվություն ու հաշտվելու բարի կամք դրսևորել միջազգային հանրակցության աջակցությամբ:
