«Ազգ», օգոստոսի 11, չորեքշաբթի, 1993թ.
Երեկ, օգոստոսի 10-ին, Մոսկվայում Ադրբեջանի մշտական ներկայացուցիչ Ռամիզ Ռզաևը մամուլի ասուլիսում հայտարարել են, թե իբր, իր ունեցած տվյալների համաձայն, հայկական զինված ուժերը մտադիր են օգոստոսի 12-ին հարձակվել և գրավել Ֆիզուլի քաղաքը: Ըստ նրա, Ադրբեջանի ներքին գործերի նախկին նախարար Իսկանդեր Համիդովը որոշել է օգտվել դրանից և օգոստոսի 14-ին իբր նախապատրաստվում է զինված հեղաշրջում կատարել: Այս հայտարարության մեկնաբանության խնդրանքով դիմեցինք Հայաստանի վարչապետի մամուլի քարտուղար Վլադիմիր Մանոյանին: Նա ասաց, որ ամենայն հավանականությամբ Ադրբեջանի զինված ուժերը նախապատրաստվում են լայնածավալ հարձակում ձեռնարկել Լեռնային Ղարաբաղի և Հայաստանի սահմանամերձ շրջանների վրա և նման հայտարարությունները զուտ քարոզչական նպատակ են հետապնդում:
