«Հայաստանի Հանրապետություն», 24 հուլիսի, 1993թ., 146(750), շաբաթ
1993թ. հուլիսի 23-ին, ժամը 14:20-ին խախտելով Հայաստանի օդային սահմանը, Ադրբեջանի ռազմաօդային ուժերի երկու ինքնաթիռ երեք կասետային ռումբ են գցել հանրապետության հարավում՝ Կապան քաղաքի վրա: Ռմբակոծության հետևանքով զոհվել է 4 և վիրավորվել 14 խաղաղ բնակիչ: Քաղաքում կան զգալի ավերածություններ, շարունակվում է հասցված նյութական վնասի հաշվարկումը:
Ադրբեջանական կողմի գործողություններն իրադրությունը սրում են այն պահին, երբ ԵԱՀԽ-ն ջանքեր է գործադրում ղարաբաղյան հակամարտությունը քաղաքական կարգավորման փուլ տեղափոխելու ուղղությամբ, ինչին զորակցում են Հայաստանի իշխանությունները: Սա հավելյալ արտահայտությունն է Բաքվի իշխանության կառույցներում շարունակվող ներքին պայքարի, այդ պետությունում զինված ուժերի անկառավարելիության, և ուղղված է ԵԱՀԽ Մինսկի խմբի նախագահ Մարիո Ռաֆայելիի նախաձեռնության ձախողմանը:
Հայաստանի Հանրապետության արտաքին գործերի նախարարությունը վճռականորեն դատապարտում է սահմանների խախտումն ու խաղաղ բնակչության դեմ ուղղված այս բարբարոսական քայլը և լիազորված է հայտարարելու, որ Հայաստանի իշխանություններն իրենց իրավունք են վերապահում ձեռնարկելու հանրապետության քաղաքացիների անվտանգությանն ու սահմանների ապահովմանն ուղղված ամենախիստ պատասխան միջոցառումներ:
Հայաստանի կառավարությունն ակնկալում է, որ միջազգային հանրությունը նույնպես վճռականությամբ կդատապարտի ադրբեջանական կողմի գործողությունը և ամենալուրջ վերաբերմունք կցուցաբերի Ադրբեջանի այն ռազմատենչ ուժերի նկատմամբ, որոնք արդեն չորս օր է ապակայունացնում են իրադրությունը Լեռնային Ղարաբաղում ու նրա շուրջը և այժմ փորձում են այդ ապակայունացումը տարածել նաև Հայաստանի Հանրապետության սահմանամերձ շրջանների վրա:
23 հուլիսի, 1993թ., քաղ. Երևան
