March 28, 2024

Հայկական պառլամենտի բացումը

  • by Archives.am
  • 4 Years ago
  • 0

«Մշակ», 11 օգոստոսի, 1918թ., թիվ 158

Հայկական հանրապետության պառլամենտի բացման առիթով «Кавказское Слово» թերթը առաջնորդող հոդվածի մեջ ասում է.

«Հայ ժողովրդի կյանքում օգոստոսի 1-ի օրը կմնա իբրև ամենանշանավոր օրերից մեկը: Այդ օրը Երևանում տեղի ունեցավ հայ հանրապետության պառլամենտի բացման՝ ըստ պարագաների համեստ, սակայն ըստ իր նշանակության մեծ հանդեսը:

Այդ փաստի մասին, հարկավ, ռադիոհեռագիրներ չեն ուղարկելու աշխարհիս այս ու այն կողմը, աշխարհի թերթերը առաջնորդողներ չեն նվիրի նրան և մեծ ու երջանիկ ժողովուրդներն ազատ միջոց չեն գտնի առանձնապես ընդգծելու այդ փաստը և ըմբռնելու նրա իմաստը:

Բայց ողջ աշխարհի հայերի սրտում, ուր էլ որ գտնվելիս լինեն նրանք և կյանքի ինչ պայմաններում ապրելիս լինեն, լուրը այդ եղելությանը մասին կառաջացնե խնդագին արձագանք:

Չնայած արտաքին պարագաների անպաճույճ լինելուն, չնայած տիրող անվստահությանը գալիք օրվա նկատմամբ, չնայած այն բոլոր տեսանելի տանջանքներին, որ դեռևս շարունակում է կրել արյունաքամ լինող և վերջնականապես ջախջախվող հայ ժողովուրդը, նա այնուամենայնիվ արտակարգ ճիգ է անում՝ ժպիտով դիմավորել օգոստոսի 1-ի դեպքը, որովհետև այդ դեպքի մեջ հայ ժողովուրդը կնշմարե ազգային գաղափարի իրագործումը, մարմնացումը այն բանի, ինչ դարերով փայփայում էր ժողովրդի անուրջների և ցնորքների մեջ և նկատվում էր որպես հրաշք:

Այժմս արդեն Հայաստանի ազատ հանրապետության հիմքը դրված է:

Այժմս արդեն գոյություն ունի այն կենտրոնը, որի շուրջը, մենք հավատում ենք, պիտի համախմբվեն հայ ժողովրդի կենսական և ստեղծագործիչ ուժերը, և երիտասարդ պետության գլխին պիտի շողշողա խաղաղ և ստեղծագործական աշխատանքի բարեբերության ոգին:

Մենք հավատում ենք այդ բանին, որովհետև գիտենք, որ հայ ժողովուրդը, ամեն ձախորդությունների միջոցին, միշտ և անդավաճան ձգտում էր դեպի այն՝ նրա համար՝ օրհնյալ վայրերը, որոնց հետ կապված են այնքան ապրումներ — թե պատմական, թե ազգային, թե կրոնական — դեպի ալեզարդ Մասիսը, դեպի սրբազան Արաքսը, դեպի սուրբ Էջմիածինը: Եվ հենց այդ վայրումն է, որ այսօր կրկին վառվում է հայ ժողովրդի համար պետական և քաղաքական նոր գոյության ջահը:

Հազար վեց հարյուր տարի առաջ այնտեղ, ուր այժմ Էջմիածինն է, Գրիգոր Լուսավորչի տեսլեան մեջ իջավ Միածինը և ոսկե մուրճի հրավածով դրոշմեց այն տեղը, ուսկից պիտի սփռվեր համայն Հայաստանի վրա աստվածային վարդապետության լույսը: Եվ այդ լույսը տարածվեց և կռվան եղավ հայերի եթե ոչ քաղաքական, գոնե ազգային գոյության պահպանման:

Այժմ Երևանից, որ Էջմիածնից միայն մի քանի վերստի վրա գտնվում, պիտի տարածվի Հայաստանի վրայով կուլտուրական դեմոկրատական պետականության նոր լույսը, և հենց այդ լույսն է, որ ընդունակ է ստեղծել և պահպանել հայերի անկախ քաղաքական գոյությունը:

Եվ մենք ողջունում ենք հայկական կառավարության առաջին և իմաստուն քայլը, որ Հայաստանի Հանրապետության բացման նիստին, որպես իրավահավասար անդամներ, մասնակցել են մահմեդականների, ռուսների և եզիդիների ներկայացուցիչները: Նույն հանդեսին ներկա են գտնվել նաև եվրոպական մեծ և քաղաքակիրթ պետությունների՝ Ավստրո-Հունգարիայի և Գերմանիայի ներկայացուցիչները: Եվ հետագայում էլ արդարության, հավասարության և եղբայրության զգացումը դեպի երիտասարդ հանրապետության բոլոր քաղաքացիները, առանց ազգի խտրության, չպիտի վերանա հայ ժողովրդի առաջնորդների հոգուց և դեմոկրատական մեծ նշանաբանները պիտի ամենայն անշեղությամբ և հաստատակամությամբ մարմնացվեն կյանքի մեջ»:

  • facebook
  • googleplus
  • twitter
  • linkedin
  • linkedin
Previous «
Next »

Leave a Reply

Your email address will not be published. Required fields are marked *

Categories

Archives