January 25, 2021
  • Homepage
  • >
  • Media
  • >
  • Armenian media
  • >
  • Հայաստանի Հանրապետության արտաքին գործերի նախարարության հայտարարությունը

Հայաստանի Հանրապետության արտաքին գործերի նախարարության հայտարարությունը

  • by Archives.am
  • 27 Years ago
  • 0

«Հայաստանի Հանրապետություն», 7 սեպտեմբերի, 1993թ., թիվ 177(781), երեքշաբթի

Հայաստանի Հանրապետության արտաքին գործերի նախարարությունը իր խորին մտահոգությունն է հայտնում հարևան երկրների սպառնալի հայտարարությունների և տարածաշրջանում զինվորական տեղաշարժերի մասին հաղորդվող լուրերի կապակցությամբ, որոնք անվստահության և տագնապի մթնոլորտ են ստեղծում:

Ստեղծված իրադրությանը կամ ներքին հանրային կարծիքին հակազդելու պատրվակով կատարվող այս գործողություններն իրականացվում են այն պահին, երբ նշանակալի առաջխաղացում է նկատվում ինչպես ռազմական գործողությունների մեղմացման իմաստով, այնպես էլ դիվանագիտական ասպարեզում:

Վերջին մի քանի օրերի ընթացքում Ադրբեջանի ու Լեռնային Ղարաբաղի միջև Ռուսաստանի Դաշնության միջնորդությամբ ձեռք է բերվել զինադադարի երկարաձգման համաձայնություն: Հայաստանի Հանրապետության նախագահի կոչով Լեռնային Ղարաբաղն իր զինված ուժերը միակողմանիորեն դուրս է բերել Կուբաթլիի շրջանից: Համաձայնություն է ձեռք բերվել նաև հակամարտության երկու կողմերի միջև ուղիղ երկխոսությունը բարձրագույն մակարդակով շարունակելու մասին:

Ի լրումն այս ամենի, ԵԱՀԽ Մինսկի խմբի նախագահության հրավերով և բոլոր ընդգրկված կողմերի համաձայնությամբ սեպտեմբերի 9-ին Մոսկվայում պետք է վերագումարվեն Մինսկի խմբի անպաշտոն խորհրդակցությունները:

Դեպքերի այս զարգացումը հավատ է ներշնչում, որ հակամարտության կողմերն ի վերջո հանգել են այն եզրակացության, որ հարցի ռազմական լուծումն անցանկալի է ու անհնար, և հակամարտությունը մոտենում է ավարտին:

Հայաստանի արտաքին գործերի նախարարությունը ակնկալում է, որ այս պայմաններում խնդրին առնչվող բոլոր երկրների ու կազմակերպությունների կողմից զսպվածություն ու աչալրջություն կցուցաբերվի: Առանձնապես կարևոր է, որ հարևան ու շահագրգիռ մյուս երկրները զսպեն Լեռնային Ղարաբաղի հակամարտությունն առավել լայն նպատակների համար օգտագործելու իրենց գայթակղությունը՝ չվատթարացնելով իրադրությունը և հակամարտության լուծումն ավելի չբարդացնելով:

Հակամարտության մեջ չեզոքությունը, տարածաշրջանի անվտանգության նկատմամբ մտահոգությունն ու զգոնությունը բոլոր միջնորդական ջանքերի անհրաժեշտ պայմաններն են:

Հայաստանի Հանրապետության արտաքին գործերի նախարարությունը միջազգային հանրությանն ու առանձին երկրներին կոչ է անում առավել ակտիվորեն օժանդակել ներկա խաղաղարար ջանքերին և, հետևելով Հայաստանին, իրենց ազդեցությունն օգտագործել հակամարտող կողմերի վրա, որպեսզի չվերսկսվեն ռազմական գործողությունները, և իրականացվեն ՄԱԿ-ի Անվտանգության խորհրդի 822 և 853 բանաձևերը:

Մենք հուսով ենք նաև, որ միջազգային հանրությունը ժամանակին գործ կդնի իր լծակները՝ կանխելու համար հակամարտության միջազգայնացումը:

6 սեպտեմբերի, 1993թ.

  • facebook
  • googleplus
  • twitter
  • linkedin
  • linkedin
Previous «
Next »

Leave a Reply

Your email address will not be published. Required fields are marked *

Categories

Archives