March 28, 2024

Կարեն Բաբուրյանի հայտարարությունը

  • by Archives.am
  • 31 Years ago
  • 0

«Հայաստանի Հանրապետություն», 12 օգոստոսի, 1993թ., թիվ 159(763), հինգշաբթի

Վերջին օրերին ադրբեջանական լրատվական ծառայությունները, ինչպես նաև՝ պաշտոնական ներկայացուցիչները հաղորդումներ են տարածում ԼՂՀ պաշտպանության բանակի կողմից Ֆիզուլին գրավելու մասին:

Հավատարիմ մնալով հակամարտության խաղաղ լուծմանն ուղղված ցանկացած գործողություն տապալելու գործելակերպին, Ադրբեջանի ղեկավարությունն այս անգամ նույնպես հետապնդում է Հռոմի բանակցությունների շուրջն իրադրությունը սրելու նպատակ:

Այդ կերպ ապատեղեկացնելով ՄԱԿ-ի Անվտանգության խորհրդի անդամ պետություններին Ֆիզուլի քաղաքը գրավելու մասին, Ադրբեջանը էապես ազդեց ՄԱԿ-ի 853 բանաձևի բնույթի վրա:

Մինչդեռ Ֆիզուլի քաղաքին առնչվող բոլոր հաղորդումները, ինչպես պարզվում է հետագայում, նպատակամիտված ապատեղեկատվություն են: Ավելին, օգոստոսի 9-ին Ադրբեջանի լրատվական ծառայությունները հաղորդեցին ադրբեջանական բանակի ուժեղ հարձակողական գործողությունների և նրա կողմից Ֆիզուլու մոտակայքում մի քանի բնակավայրերի և ռազմավարական նշանակության բարձունքների գրավման մասին:

Նմանօրինակ իրավիճակ Ադրբեջանում առաջին անգամ չէ, որ ստեղծվում է: Ամեն անգամ, համակված իշխանության համար պայքարի մոլուցքով, Ադրբեջանի քաղաքական ուժերը, կորցնելով կողմնորոշիչներն ու չափի զգացումը, իրենց նպատակներին հասնելու համար մոլորության մեջ են գցում համաշխարհային հանրությանը և առաջին հերթին ադրբեջանական ժողովրդին, նոր արգելքներ են ստեղծում երկկողմ բանակցությունների գործընթացն սկսելու ճանապարհին:

Ֆիզուլի քաղաքի շուրջ ներկայիս իրարանցումը, անկասկած, կապված է Ադրբեջանական Հանրապետության նախագահին վստահության հանրաքվեի հետ:

Արտահայտելով մեր ժողովրդի կամքը, մենք բազմիցս հայտարարել ենք և վերստին հաստատում ենք մեր պատրաստակամությունը կրակը անհապաղ դադարեցնելու համար Մինսկի գործընթացի շրջանակներում Ադրբեջանի Հանրապետության հետ ուղղակի բանակցություններին, որոնց ընթացքում պատրաստ ենք քննարկել բոլոր, այդ թվում և մարտական գործողությունների ընթացքում գրավված տարածքների հարցերը:

11 օգոստոսի, 1993թ.
Ստեփանակերտ

  • facebook
  • googleplus
  • twitter
  • linkedin
  • linkedin
Previous «
Next »

Leave a Reply

Your email address will not be published. Required fields are marked *

Categories

Archives