«Երկիր», 8 սեպտեմբերի, 1993թ., թիվ 170(511), չորեքշաբթի
Ադրբեջանում քաղաքական իրավիճակի նշմարվող կայունացումը բարենպաստ նախադրյալներ է ստեղծում հակամարտության խաղաղ կարգավորման ճանապարհին գործնական քայլերի համար:
Ձգտելով ըստ ամենայնի աջակցել խաղաղ կարգավորման գործընթացին, ԼՂՀ ղեկավարությունը հրաման է տվել պաշտպանության բանակի ստորաբաժանումները դուրս բերել Կուբալու քաղաքից և մերձակա մի շարք գյուղերից, և այդ աշխատանքն արդեն ավարտված է:
Լեռնային Ղարաբաղի Հանրապետությունը որևէ հավակնություն չունի ադրբեջանական տարածքների նկատմամբ, իսկ Լեռնային Ղարաբաղի պաշտպանության բանակի գործողությունները բացառապես պատասխան բնույթ են կրում և թելադրված են սոսկ հանրապետության բնակչության անվտանգության նկատառումներով:
Հատուկ նշանակություն տալով Ադրբեջանի հետ սկսված երկխոսությանը և Մոսկվայում կայանալիք Մինսկի խմբի հանդիպմանը, Լեռնային Ղարաբաղի Հանրապետության ղեկավարությունը մեկ անգամ ևս հավաստում է Լեռնային Ղարաբաղի խնդրի խաղաղ կարգավորման հարցերի ողջ համալիրը և, առաջին հերթին, կրակի դադարեցման ու գրավված տարածքներից զորքերի դուրս բերման հարցերը քննության առնելու իր պատրաստակամությունը:
Հույս ենք հայտնում, որ Ադրբեջանի իշխանությունները ևս պատրաստ են գործնական քայլեր ձեռնարկել խաղաղ կարգավորման գործընթացի արդյունավետ ծավալման ուղղությամբ:
«Հայլուր»
