«Երկիր», 1993թ., 11 մարտի, 44 (385)
Ինչպես հաղորդում է «Տելեֆաքս» հեռուստածրագիրը, մարտի 7-ին Ադրբեջանի նախագահի մամլո ծառայությունը «Ազերթաջի» ալիքներով տարածել է մի հայտարարություն, որով դժգոհություն է հայտնվում Ադրբեջանի մասին Ռուսաստանի լրատվական գործակալությունների տարածած «անհանդուրժելի, բացահայտ սադրիչ բնույթ կրող» լուրերի առիթով։
«Մարտի 7-ին «Վեստի» ծրագրով ռուսաստանյան հեռուստատեսությունը տարածել է «Նեգա» գործակալության հաղորդագրությունը, որ իբր լեզգիաբնակ շրջաններում տեղի է ունեցած հանրահավաքը ցրվել է Ադրբեջանի հատուկ նշանակության ջոկատների կողմից, որի ընթացքում սպանվել են 7 լեզգիներ։
Իրականում մարտի 5-ին Կուսարիի շրջանում բազմահազարանոց հանրահավաք է տեղի ունեցել, որը նվիրված էր զորակոչին։ Այն անցել է հանգիստ պայմաններում եւ, հասարակական կարգի խանգարման դեպքեր չեն եղել», ասվում է հայտարարության մեջ։ Ընդգծելով, որ «Վեստի» ծրագրով հնչած հաղորդագրությունը Ադրբեջանում ազգային թշնամանք հրահրելու միտում ունի, հայտարարության մեջ պահանջվում է պաշտոնական հերքում տալ, ինչպես նաեւ Ռուսաստանի Դաշնության իրավապահ մարմինների եւ մամուլի ու զանգվածային լրատվության նախարարության ուշադրությունն է հրավիրվում նման լուրերի հրապարակման անթույլատրելիության վրա։
Ադրբեջանի նախագահի մամլո ծառայությունը Մոսկվայի լեզգիական համայնքի ներկայացուցիչներին, ինչպես նաեւ տարրեր լրատվական գործակալությունների աշխատակիցներին հրավիրում է Կուսարիի շրջան՝ տարածված լուրերի անճշտության մեջ տեղում համոզվելու նպատակով։
«Հայլուր»
