Կառավարության լրաբեր, 20 սեպտեմբերի, 1918թ.
Խոլերայի դեմ կռվող գլխավոր կոմիտեն ներքին գործոց մինիստրության հաղորդում է, որ Աշտարակում և Էջմիածնում խոլերան վերջանալու վրա է։ Շնորհիվ այն բանի, որ Աշտարակի և Էջմիածնի սանիտարական լիազորները և տեղական վարչությունները ջերմեռանդ աջակցություն են ցույց տալիս շուկայում ու տներում մաքրություն պահպանելու գործում, պատահում են միայն խոլերայի հազվագյուտ դեպքեր։ Այդ վայրերում կա երկու հանգամանք, որ նպաստում է խոլերային. դա գաղթականներին վերաբերող հացի և բնակարանի հարցերն են։ Պատահել են սովամահի դեպքեր։ Մի շարք միջոցներ են ձեռք առնվում գաղթականների դրությունը բարելավելու։
