Կառավարությունում սպասվում են նոր նշանակումներ
Մինչ նախկին արտգործնախարար Րաֆֆի Հովհաննիսյանի տեղը դեռևս թափուր է, Հայաստանի նախագահը երեկ ստորագրեց մի նոր հրամանագիր, որով պաշտպանության հարցերով պետնախարար Վազգեն Մանուկյանին նշանակեց պաշտպանության նախարար: Հայաստանի նախագահի մամուլի ծառայության հաղորդման համաձայն, Վազգեն Սարգսյանը կկատարի նախագահի խորհրդականի և սահմանամերձ շրջաններում նախագահի անձնական ներկայացուցչի պարտականությունները: Օրերս մեր թերթին տված հարցազրույցում Վազգեն Սարգսյանը նշել էր, թե ինքը պատրաստ է դուրս գալ, բայց այն դեպքում, երբ հասնենք իրական հաջողությունների:
Այդ պահը թերևս դեռ չէր եկել, բայց հանրապետության նախագահը գերադասեց ընտրել Վազգեն Մանուկյանին, որը մինչ այդ հայտարարել էր, թե պետք է ժամանակավորապես դադարեցնել խորհրդարանի գործունեությունը և իրականացնել ռազմական իրավիճակին հատուկ միջոցառումներ: Դա է վկայում նաև խորհրդարանի երեկվա նիստում նախագահի կողմից Վ. Մանուկյանի ներկայացրած օրենքի նախագիծը, որով նախատեսվում են առանձին շրջաններում ռազմական դրություն մտցնելու միջոցառումներ:
Պրն Մանուկյանն առայժմ հրաժարվեց մեկնաբանել իր նոր նշանակումը՝ ասելով, թե դեռ վաղ է, և ամենայն հավանականությամբ այդ առիթով ինքը կանցկացնի մամուլի ասուլիս: Մեկնաբանելով պաշտպանության նախարարի նոր նշանակումը՝ Հայաստանի նախագահի մամուլի քարտուղար Ռուբեն Շուգարյանն ասաց, թե դա կապված է պաշտպանության համակարգում կատարվող կառուցվածքային փոփոխությունների հետ: «Վազգեն Սարգսյանն արդեն բավական աշխատանք է կատարել այդ պաշտոնում, և այժմ կարևորվում է նրա դերը որպես ռազմական գծով խորհրդականի և սահմանամերձ շրջաններում նախագահի ներկայացուցչի, քանզի նա ակտիվորեն համագործակցում է և ֆիդայական ջոկատների, և՛ պետական կազմավորումների հետ»,-ասաց պրն Շուգարյանը:
Այժմ, երբ պաշտպանության համակարգում նոր փուլ է սկսվում, դրված է ազգային բանակի ստեղծման հարցը, մամուլի քարտուղարի կարծիքով, ավելի ճիշտ կլիներ այդ գործընթացին նախկին վարչապետի մասնակցությունը, որն արդեն որոշակի փորձ ունի, և, համատեղելով պետնախարարի ու պաշտպանության նախարարի պաշտոնները, կհամակարգի զինված ուժերի և ռազմարդյունաբերական համալիրի աշխատանքները: Ինչ վերաբերում է նախարարների փոփոխությանը, ապա նրանց ուժերը պետք է օգտագործվեն այնտեղ, որտեղ ավելի արդյունավետ կլինեն:
Մամուլի քարտուղարը նաև նշեց, որ առաջիկայում կառավարական համակարգում սպասվում են նոր փոփոխություններ և նշանակումներ:
Հակոբ Ասատրյան, «Ազգ», 1992, 21 հոկտեմբերի
Վազգեն Մանուկյան: Հայկական երազանքը գոյատևման փակուղում: Ելույթներ և հոդվածների ժողովածու: Երևան, 2002թ.
