«Երկիր», 22 հոկտեմբերի, 1992թ., թիվ 191 (280)
«Ազատ մամուլ» լրատվական գործակալությունը հաղորդում է, որ հայ ազատամարտիկները հաջողել են իրենց հսկողության տակ առնել Մարտունու շրջանի Ամիրանլար, Մուղանլու և Կուրապատկինո գյուղերը, որոնք ադրբեջանական ռազմական վերջին հենակետներն էին այդ շրջանում:
Ադրբեջանական բանակը վերջին օրերին պատերազմական հիմնական գործողությունները ծավալվում են Մարտունի քաղաքի և շրջանի Ճարտար և Մաճկալաշեն գյուղերի ուղղությամբ:
Հոկտեմբերի լույս 2-ի գիշերը ադրբեջանական բանակի ստորաբաժանումները, հրետանային նախապատրաստություններից հետո, մեծաքանակ հետևակով և զրահատեխնիկայի մասնակցությամբ Ամիրանլար, Մուղանլու, և Կուրապատիկո գյուղերից սկսել են առաջ շարժվել դեպի Մարտունի քաղաքի պաշտպանական դիրքերը: ԼՂՀ պաշտպանության ուժերին ոչ միայն հաջողվել է ետ մղել թշնամու հարձակումը, այլ խուճապ առաջացնել ադրբեջանական բանակում և անցնել հակահարձակման: Ադրբեջանական զինյալները, չդիմանալով հայերի ճնշմանը, սկսել են նահանջել իրենց դիրքերից, թողնելով զրահատեխնիկան և զինապահեստները:
Երեկ, առավոտյան ժամը 10-ի դրությամբ, ադրբեջանցիները խուճապահար նահանջում էին դեպի Աղդամի շրջան:
Կեսօրին հայ ազատամարտիկները իրենց դիրքերն էին ամրապնդում ԼՂՀ Մարտունու շրջանի սահմանի վրա:
Ադրբեջանական բանակի այս հանգրվաններն վնասազերծելուց հետո, հայերի վերահսկողության տակ են անցել Մարտունու շրջանի լավագույն վարելահողերը, որոնք երկու տարի շարունակ օգտագործվում էին Ադրբեջանի կողմից:
Թշնամու կողմից կա տասից ավելի սպանված: Հայկական կողմից զոհվել են երկու ազատամարտիկ, կան մի քանի վիրավորներ:
Ժամը 17:00-ի դրությամբ, կատաղի մարտերը շարունակվում էին Մարտունու սահմանային գոտում: Ադրբեջանցիներին օժանդակ ուժեր էին հասնում Աղդամի և Ֆիզուլու շրջաններից:
