«Երկիր», 20 օգոստոսի, 1992թ., թիվ 159 (248)
Օգոստոսի 19-ին պաշտպանության ԼՂՀ Պաշտպանության պետական կոմիտեում անցկացվեց խորհրդակցություն, որին մասնակցում էին հանրապետության հիմնարկ–ձեռնարկությունների, կազմակերպությունների ղեկավարները և տնօրեններ: Խորհրդակցության ժամանակ ռազմական դրություն մտցնելու նպատակների և պատճառների, ինչպես նաև Պաշտպանության կոմիտեի ստեղծման անհրաժեշտության մասին լրատվությամբ հանդես եկավ Ռոբերտ Քոչարյանը:
Նշվեց, որ կատարված փոփոխությունների հիմնական նպատակը՝ բոլոր տեսակի ձեռնարկությունների և կազմակերպությունների աշխատանքների ենթարկումն է ռազմական կացությանը: Խորհրդակցության ժամանակ ԼՂՀ տնտեսության վերականգնման, ռազմական իրավիճակի և զորակոչի անցկացման պայմաններում աշխատանքային կոլեկտիվի աշխատանքային կարգավորման և աշխատանքային կարգապահության հարցերի մասին ելույթ ունեցան ՊՊԿ-ի անդամներ Բորիս Առուշանյանը, Արմեն Իսգուլովը և հանրապետության զինկոմ Վ. Թումանյանը: Քննարկված հարցերի առնչությամբ արվեցին համապատասխան կարգադրություններ և սահմանվեցին որոշակի ժամկետներ նշված հարցերի իրականացման համար:
