«Երկիր», 1992թ., 1 դեկտեմբերի, 232 (321)
Աբխազիայի Հանրապետության պաշտպանության նախարարությունն հայտնել է, որ Էշերա-Սուխում ուղղությամբ կրակը ժամանակավորապես դադարեցնելու վերաբերյալ համաձայնության ժամկետը լրացնելուց հետո, ռազմաճակատի ողջ երկարությամբ հազվադեպ փոխհրաձգություն է տեղի ունենում:
Ըստ նույն աղբյուրի, Օչամչիր-Տկվարչել ուղղությամբ շարունակվել են մարտերը Վրաստանի կառավարական զորքերի կողմից վերահսկվող Քոչարա գյուղի ազատագրման համար: Վրացական ուժերը հարկադրված նահանջել են գյուղից և դիրքեր գրավել Ցխիցկար բնակավայրի մատույցներում: Մարտեր են մղվում Աղադու և Մերկուլա գյուղերի համար:
Նոյեմբերի 29-ին երեկոյան Գուդաուտա է ժամանել ՄԱԿ-ի դիտորդների պատվիրակությունը՝ Մ. Տաշևսկու գլխավորությամբ: Պատվիրակությունը հակամարտության գոտի է այցելել վրացական կողմի հրավերով և մինչև Գուդաուտա հասնելը եղել է Թբիլիսիում և Սուխումում:
Նույն օրը պատվիրակությունը հանդիպում է ունեցել Աբխազիայի Հանրապետության ԳԽ պատգամավորների հետ: Աբխազական կողմի կարծիքով պատվիրակության անդամները վրացամետ դիրքորոշում ունեն:
