«Հայաստանի Հանրապետություն», 14 հունվարի, 1992թ., թիվ 7 (352)
Ս.թ. հունվարի 1-ին և 2–ին Վրաստանի Հանրապետության հակամարտ կողմերը՝ պաշտոնական իշխանությունները և ընդդիմության ղեկավարները, դիմել էին ՀՀ կառավարությանը հաշտարար միջնորդի դեր ստանձնելու խնդրանքով։ Հայաստանի կառավարությունը, ընդառաջելով այդ դիմումներին և եղբայրական Վրաստանում զինված հակամարտությունը շուտափույթ դադարեցնելու մտահոգությամբ, կազմեց մի պատվիրակություն, որը հունվարի 2-3-ին Թբիլիսիում հանդիպումներ ունեցավ կողմերի ղեկավարության հետ:
Հանդիպումների ընթացքում քննարկվեցին կրակի դադարեցման, հետագա արյունահեղությունը կանխելու հարցերը։ Շոշափվել է նաև նախագահ Գամսախուրդիայի հանրապետությունից հավանական մեկնման դեպքում Հայաստանում ժամանակավոր ապաստան տրամադրելու հարցը:
Հունվարի 6-ին ընդդիմությունը հնարավորություն տվեց նախագահ Գամսախուրդիային և նրան ուղեկցող անձանց հեռանալ Վրաստանից և Ադրբեջանի տարածքով անցնել Հայաստան:
Հաջորդ օրը ստացվեց Թ. Սիգուայի հեռագիրը, որով Հայաստանի կառավարությանը տեղյակ էր պահվում, որ Վրաստանի կառավարությունը չի առարկում Զվիադ Գամսախուրդիային և նրա ընտանիքին Հայաստանում ապաստան տալուն: Ինչ վերաբերում է նրանց ուղեկցող ավելի քան 100 զինված անձանց, Վրաստան վերադառնալու դեպքում խոստանում են նրանց լիակատար ներում շնորհել:
Հունվարի 9-ին Զվիադ Գամսախուրդիան պաշտոնապես դիմեց ՀՀ ձախագահ Լ. Տեր-Պետրոսյանին՝ խնդրելով ժամանակավոր քաղաքական ապաստան տրամադրել իրեն, իր ընտանիքին և անձնական թիկնապահներին:
Մեկ օր անց պատասխան նամակում Լ. Տեր-Պետրոսյանը հաղորդել է Գամսախուրդիային և նրա ընտանիքին Հայաստանում ժամանակավոր ապաստան տալու որոշումը։ Առաջարկվել է նաև, որ զինված անձինք զենքն ու զինամթերքը արձանագրությամբ հանձնեն Հայաստանի իշխանություններին՝ դրանք Վրաստանի օրինական իշխանություններին վերադարձնելու նպատակով։ Միաժամանակ պայմանավորվածություն ձեռք բերվեց, որ պ-ն Գամսախուրդիայի կողմից Հայաստանի տարածքը չպետք է օգտագործվի քաղաքական գործունեություն ծավալելու նպատակով։
Հայաստանի կառավարությունը, հարգելով ինքնիշխան Վրաստանի ներքին գործերին չմիջամտելլու սկզբունքը, շահագրգռված է եղբայրական Վրաստանում քաղաքական իրադրության շուտափույթ կայանացմամբ և խաղաղության հաստատմամբ։
Միաժամանակ կոչ ենք անում զանգվածային լրատվության բոլոր միջոցներին, Հայաստանի տարածքում Զվիադ Գամսախուրդիայի ժամանակավոր գտնվելուն առնչվող իրադարձությունները լուսաբանել օբյեկտիվորեն և դրսևորել հավասարակշռված մոտեցում։
Համոզված ենք, որ Հայաստանի իշխանությունների մարդասիրական ջանքերն ըստ արժանվույն կգնահատվեն վրաց ժողովրդի կողմից և կնպաստեն հայ-վրացական դարավոր բարեկամական կապերի ամրապնդմանը:
