«Երկիր», 1993թ., 6 ապրիլի, 61 (402)
Անցյալ շաբաթ օրը, ապրիլի 3-ին, Ամերիկյան համալսարանին հարող տարածքում «Երկիր» օրաթերթի խմբագրությունը կատարեց համաժողովրդական ծառատունկի մեջ իր ծրագրած ծավալը: Խմբագրության աշխատակիցների հետ միասին ծառատունկին մասնակցեցին նաև թերթի բազմաթիվ ընթերցողներ: Բոլորին մեր անկեղծ շնորհակալությունը:
Մեր կողքին ծառ էին տնկում Ամերիկյան համալսարանի աշխատակիցները, ուսանողներ, «Կոփավանք» երիտասարդական միության անդամներ, մոտակա տների բնակիչներ: Գարնանային այդ օրը գեղեցկացավ հարյուրավոր շիվերով, իրար ժպտացող դեմքերով: Սակայն «Երկիրի» տնկած ծառն էլ է զայրացնում պաշտոնական լրատվության ներկայացուցիչներին, ու մենք լուռ հետևողականությամբ դուրս ենք մնում ծառատունկի մասնակիցների շրջանից: Թե՛ զանգվածային լրատվության պետական միջոցները, թե «Լրաբեր» ծրագիրը հարկ չհամարեցին համապատասխան տեղեկատվության մեջ նույնիսկ հիշել մեր անունը: Ամոթ է ընդամենը և ոչ թե ցավ. Մեր դրած տնկիները դրանից չեն տուժի…
