«Երկիր», 15 փետրվարի, 1992թ.
Փետրվարի 13-ին կայացած մամլո ասուլիսի ժամանակ, պատասխանելով թղթակիցների հարցին, թե ինչպիսին է Արցախի ղեկավարության կարծիքը Լևոն Տեր-Պետրոսյանի և Այազ Մութալիբովի հնարավոր հանդիպման մասին, ԼՂՀ Գերագույն խորհրդի արտաքին հարաբերությունների հանձնաժողովի նախագահ Լևոն Մելիք-Շահնազարյանը ընդգծել է, որ «առանց ԼՂՀ-ի մասնակցության որևէ բանակցություն դժվար թե ցանկալի արդյունք տա, պետք է անպայման հաշվի առնել այն փաստը, որ Լեռնային Ղարաբաղում արդեն ձևավորվել է և գոյություն ունի անկախ հանրապետություն»:
Ինչ վերաբերում է ընդհանրապես բանակցությունների գաղափարին, ապա բարձր մակարդակով երկխոսությունը հնարավոր է միայն այն դեպքում, երբ Ադրբեջանը դադարեցնի ռազմական գործողությունները ԼՂՀ տարածքում: Այս առնչությամբ հանձնաժողովի նախագահը որոշակի հույսեր է կապել նաև Եվրոպայի Անվտանգության և Համագործակցության խորհրդի պատվիրակության Ղարաբաղ ակնկալվող այցի հետ:
