«Երկիր», 1993թ., 12 հունվարի 4 (346)
ՀՀ ժողպատգամավորների Ստեփանավանի քաղխորհրդի հերթական նստաշրջանը քննարկել է ՀՀ նախագահին եւ կառավարությանը անվստահություն հայտնելու հարցը, որը օրակարգ է մտցրել պատգամավորների ՀՅԴ ֆրակցիան։ Հարցը օրակարգ մտցնելու օգտին են քվեարկել մասնակից 37 պատգամավորներից 27-ը։
Քաղխորհուրդը որոշում է ընդունել ՀՀ նախագահին եւ կառավարությանը անվստահություն հայտնելու կապակցությամբ ՀՀ Գերագույն խորհրդին դիմելու մասին։
« Մեզ հայտնի է դարձել նաեւ, որ քաղխորհրդի որոշումը գտնվում է ՀՀ Գերագույն խորհրդի տեղական ինքնակառավարման հարցերի հանձնաժողովում, որտեղ փորձ է արվում, ինչ-ինչ պատճառականություններով, քվեարկության արդյունքները ճանաչել ապօրինի։ Իսկ քաղխորհրդի որոշման մեջ մասնավորապես ասված է. «Ստեփանավանի քաղաքային խորհուրդը նշում է, որ հանրապետությունում ստեղծվել է քաղաքական, տնտեսական, ռազմական ճգնաժամային, տագնապալից իրավիճակ։ Ժողովուրդը գտնվում է սոցիալապես եւ իրավապես անպաշտպան իրավիճակում։
Իշխանությունների կողմից սթափ մոտեցում չի ցուցաբերվում երկրի տնտեսական կենտրոնացված համակարգի ամրապնդման ուղղությամբ։ Հանրապետության ողջ տնտեսությունը քայքայման եզրին է, չի աշխատում գործարանների մեծ մասը։ Գտնվելով բացահայտ պատերազմական իրավիճակում՝ իշխանությունները վճռական միջոցներ չեն ձեռնարկում հայրենիքի պաշտպանության գործը ամուր հիմքերի վրա դնելու համար։ Շարունակ գնդակոծվում են մեր սահմանամերձ գյուղերը։ Հանրապետությունում ստեղծվել է անկառավարելի ու քաոսային վիճակ, քանի որ ցայսօր չի ստեղծվել հանրապետության Սահմանադրությունը, եւ փաստորեն գործում են խորհրդային նախկին սահմանադրությունն ու օրենքները, որոնք հնարավորություն են տալիս իշխանություններին գործել կամայականորեն եւ խուսափել պատասխանատվությունից։
Այս ամենը իրենց բացասական ազդեցությունն են թողնում նաև Ստեփանավանի տնտեսական ու սոցիալական բոլոր բնագավառների վրա։ Ստեփանավանի քաղաքային խորհուրդը որոշում է.
Դիմել ՀՀ Գերագույն խորհրդին,
- Անվստահություն հայտնել ՀՀ նախագահին եւ կառավարությանը,
- Հրավիրել Սահմանադիր ժողով,
- Ներազդել կառավարաթյան վրա՝ Ստեփանավանը գործնականորեն ճանաչելու աղետի գոտի՝ նրա նկատմամբ անհապաղ կիրառելով աղետի գոտու կարգավիճակին համապատասխանող միջոցառամներ»:
«Ղարաբաղյան հիմնահարցը չպետք է քաղաքական գործիչների շահարկման առարկա դառնա»
«Ղարաբաղում խաղաղության հաստատման գործը չպետք է շահարկվի քաղաքական գործիչների կողմից, որոնք փորձում են այն փակուղի մտցնել», -«Սնարքի» թղթակցին ասել է Հայաստանի քաղաքագետների ասոցիացիայի նախագահ Հմայակ Հովհաննիսյանը։
Նրա խոսքերով, այն քաղաքական գործիչները, որոնք երեկ պատերազմ էին խաղում, իսկ այսօր խաղաղության համար են ջանքեր թափում, վճռելով երկու ժողովուրդների համար ճակատագրական հարցեր՝ պարտավոր են կամ հաշվի նստել իրականության հետ կամ էլ հրաժարվել հակամարտության խաղաղ կարգավորման ուղիներ որոնելուց։
Խոսելով վերջերս Մոսկվայում ստեղծված հայ-ադրբեջանական համաձայնեցնող հանձնաժողովի գործունեության մասին՝ Հ. Հովհաննիսյանն ընդգծել է, որ Հայաստանի ներկայացուցիչներին հաջողվել է ադրբեջանցիներին համոզել, որ հիմնահարցի լուծման անհրաժեշտ պայման է հանդիսանում Լեռնային Ղարաբաղի ժողովրդավարական ներկայացուցիչների մասնակցությունը բանակցությունների գործընթացին։
